تحب تطلع ايه لما تكبر ؟

تحب تطلع ايه لما تكبر ؟

اجمل ما في المراهقه هوا تخلصك من كل الاسئله الساذجه التي يلقيها عليك الكبار وانت طفل اقصر من كرسي السفرة .
كانت اسئله الكبار تدمر خيالي وتفسد مزاجي كطفل يبحث عن اسئله ذات معنى ، اسئله تنشط المخ وتفتح باب لافكار جديده مفيده او لافكار مضحكه ، طفل يبحث عن اسئله ذكيه تعطيه فرصه لان يكبر ويقترب من عالم الكبار .
ولكن تأتي الرياح محمله بالاتربه ، فقد كانوا الكبار مصرين على الاسئله التي تدعو للهبل .... ( زي ... )

1 – بتحب ماما اكتر ولا بابا اكتر ؟؟
حاولت كثريا ان اقنع من يسألني هذا السؤال انني احبهما ( هما الاتنين قد بعض ) ، ولكن هيهات .. يصر صاحب السؤال على ان يحصل على اجابه محدده ( لأ ماينفعش قولي بتحب مين اكتر ) ، وعندما يفشل في الحصول على الاجابه التي يحلم بها .. تكتسي وجهه بملامح المراقب في لجنه الامتحان ... وعندما يشعر باليأس .. يضع يده على كتفي قائلا .. ( برافو )
_ برافو على ايه .؟

2 – نفسك تطلع ايه لما تكبر ؟
كانت اجابتي واحده دايئما لا تتغير ( عايز اكبر وبس ) ، ولم اكن مقتنعا باي اجابات اخرى ( اصلا انا لحد دلوقتي مش عارف انا عايز اطلع ايه لما اكبر ) ، وكنت احيانا اخترع اجابات لامزح من مع يسألني ( نفسي اطلع تاجر قطع غيار سيارات ) ؟
كنت بقول لامي عندما تسألني هذا السؤال ( نفسي اطلع دكتور ... علشان هيا كانت عايزة كده ) ، وكنت بقول لابي ( نفسي اطلع ظابط ... علشان هو كان عايز كده ) ، وفي احد المرات سألوني هما الاتنين نفس السؤال في نفس اللحظه ( شكلهم كانو متراهنين على الاجابه ) فقلت لهم بعد تفكير ( نفسي اطلع ظابط دكتور ) ، اعجبتهما الاجابه ولكن خالتي الغلسه سألتني ( انت عارف الظابط الدكتور ده بيعمل ايه ؟ ) فقلت لها : ( عارف طبعا .. ده الظابط اللي بيقبض على الدكاترة بس ) .

3 – انا اسمي ايه ؟
يقولها شخص من اقاربي عاده لا اعرف اسمه بالفعل ... وهو عارف كده كويس

4 – بتحب خالو قد ايه ؟
يكون هذا السؤال عاده مسبوق بهديه او مكافأه نقديه ، وحرصا على مشاعر خالو لابد ان تقدم الاجابه التقليديه ( قد البحر ) او تفتح ذراعيك على الآخر قائلا ( قد كده ) .
في مرة سألت ابنه اختي السؤال نفسه ، ولكن كنت قد ضايقتهاا قبل ان اسألها .. ففردت ذراعيها قائله ( مش قد كده )

5 – هتعمل ايه بالفلوس اللي اديتهالك ؟؟
بعد ان يكافئك الاب او احد الاقارب بمبلغ مالي لابد ان يسألك هذا السؤال ، والاجابه النموذجيه ( هاحوشهم ) ، لان اي اجابه تانيه قد تواجه سخريه مالهاش لازمه ( هاجيب حاجه حلوة ) ..( طيب ما احنا لسه واكلين بسبوسه ) .

6 – اللي يشتم اللي اكبر منه يبقى ايه ؟
طيب واذا كان اللي اكبر ممنه يستاهل الشتيمه هاعمل ايه ؟

7 – اللي يكدب يروح فين ؟
على حسب

8 – الولد الشاطر يقول ايه ؟
يقول ( حاضر وشكرا ولو سمحت و بعد اذنك و حضرتك و ياطنط و اسف مش هاعمل كده تاني )

9 – مين اللي جابلك الساعه الحلوة دي ؟
غالبا بيكون صاحب السؤال هوا اللي ادالك الساعه هديه ( بس بيحب يفكرك )

10 – انا اقرب لك ايه ؟
اذا نجحت في الاجابه عن سؤال ( انا اسمي ايه ؟ ) ستتم مكافأتك بهذا السؤال ؟

11 – مافيش شكرا لعمو ؟
طيب يا سيدي شكرا

12 – قلت 100 مرة البي بي فين ؟
فين ؟

13 – ليه ماضربتوش زي ما ضربك ؟
ماهو لو كان ينفع اضربه ماكنتش سبته يضربني اصلا .

14 - تعرف تعد لحد 100 ؟
ايه المخمضه دي ؟

15 – كـلب يعني ايه بالانجليزي ؟
يعني hot dog

16 – اخدت النهارده ايه في المدرسه ؟
هاكون اخدت ايه يعني ؟

17 – طلعت الكام السنادي ؟
لا والله ماكانش في ترتيب

18 – حافظ الفاتحه ؟
حافظها انت ؟

19 – اسئله فضوليه ...
وهي الاسئله التي تنهال عليك عندما ينفرد بيك احد اقاربك الكبار .. او احد الجارات بعيدا عن ماما وبابا ( ها اتغديتو ايه النهارده ؟ ) ( و طنط سلوى جابت لكو ايه معاها من الكويت ) و ( هيا اختك الكبيرة فسخت خطوبتها ليه ؟ ) و ( هو بابا كان بيزعق ليه امبارح ؟ )


وبعد هذه الاسئله المعاقه
نحمد ربنا طبعا اننا تخطينا هذه المرحله
واتمنى لكم قضاء وقت ممتع

سلاااااااااااااااااااااااااام